გუშინ თბილისის �დინამოს� ძველმა მეპატრონეებმა ფეხბურთის ფედერაციის სახელზე წერილი შეიტანეს, რომელშიც უმაღლეს ლიგაში კუთვნილი ადგილის დაბრუნებას ითხოვენ. მერაბ ჟორდანია და მისი გუნდი �დინამოს� დაბრუნებაზე უკვე კარგა ხანია ლაპარაკობენ, მაგრამ აქამდე უცნობი იყო, კონკრეტულად რა სამართლებრივი მექანიზმებით აპირებდნენ მიზნის მიღწევას. თბილისის �დინამოს� ყოფილ ვიცე-პრეზიდენტ რომან შოთაძეს სწორედ ამ საკითხების გასარკვევად დავუკავშირდით.
- ბატონო რომან, სარჩელის შეტანა რატომ დააგვიანეთ?
- იურისტებთან კონსულტაციები გვქონდა, არ ვჩქარობდით. ეს არის არა სარჩელი, არამედ, განცხადება ფედერაციის სახელზე.
- განცხადება? და სარჩელის შეტანა გადაიფიქრეთ?
- საქმე ისაა, რომ თბილისის �დინამო� ჩვენ წაგვართვა არა სასამართლომ, ან სპორტულმა არბიტრაჟმა, არამედ, კლუბში 10-პროცენტიანი წილის მქონე სპორტსაზოგადოება �დინამომ�, რომლის თავმჯდომარეც შინაგან საქმეთა მაშინდელი მინისტრი კახა თარგამაძე გახლდათ. და ეს მოხდა ზეწოლით, შანტაჟითა და მუქარით. თუმცა მაშინ სასამართლოში ახალი მეპატრონეებზე ჩვენი წილების გადაფორმება არ მომხდარა.
- ანუ, თქვენ იმედი გაქვთ, რომ კლუბს ფეხბურთის ფედერაცია დაგიბრუნებთ?
- რა თქმა უნდა, რადგან მთელმა საქართველომ იცის ეს ისტორია, როგორ წაგვართვეს კლუბი, რა ზეწოლა იყო მაშინ მერაბ ჟორდანიაზე, რა შეთითხნილი ბრალდებები წამოგვიყენეს და დაპატიმრების მუქარით რომ გვაიძულებდნენ, �დინამოზე� უარი გვეთქვა.
- კი, მაგრამ სპორტსაზოგადოება �დინამოს� მიერ წართმეულს ფედერაცია როგორ დაგიბრუნებთ?
- სპორტსაზოგადოება �დინამო� კლუბის აქციათა მხოლოდ 10 პროცენტს ფლობდა. უმაღლეს ლიგაში ადგილი ჩვენ გვეკუთვნოდა და არა - ამის შემდეგ ჩამოყალიბებულ საფეხბურთო კლუბ �დინამო თბილისს�, რომელმაც ჩვენს ნაცვლად გააგრძელა ჩემპიონატში მონაწილეობა. ჩვენ ახლა ვლაპარაკობთ უმაღლესში ჩვენს კუთვნილ ადგილზე და სხვა არაფერზე. მონაწილეს კი ადგილს ფედერაცია უმტკიცებს, ან უარს ეუბნება. 2001 წელს შექმნილმა �დინამო თბილისმა� უმაღლეს ლიგაში ჩვენი ადგილი ძალადობრივი გზით დაიკავა, მაგრამ მაშინ ფეხბურთის ფედერაციამ ამას წინააღმდეგობა ვერ გაუწია.
- ფედერაციის მაშინდელი პრეზიდენტი მერაბ ჟორდანია იყო...
- დიახ, ჟორდანია იყო, მაგრამ ყველამ არ იცის, რა პროცესები უძღვოდა წინ ამ ყველაფერს. 1995 წლის ნოემბრიდან დაწყებული, �დინამოს� ბაზაზე ლამის ყოველდღე საგამოძიებო ჯგუფები შემოდიოდნენ და ნორმალური მუშაობის საშუალებას არ გვაძლევდნენ. ფაქტობრივად, ბაზაზე ცხოვრობდნენ - ჩვენ რომ სახლებში მოვდიოდით, ისინი რჩებოდნენ. ათი ჯგუფი მაინც შეიცვალა... ეს იყო ხანგრძლივი და მუდმივი ზეწოლა. თუმცა ეს არ ყოფილა ზეწოლის ერთადერთი ფორმა. 1998 წელს მერაბმა ფედერაციის პრეზიდენტობა გადაწყვიტა. ყრილობაზე გამომძიებელმა განაცხადა, რომ ჟორდანიას მიმართ ბრალდებების წაყენებას აპირებდნენ. ანუ, მიგვანიშნა - კანდიდატურა მოხსენით, თორემ დაგიჭერთო. მიზანი - ჟორდანიას �დინამოდან� და ფეხბურთის ფედერაციიდან ჩამოშორება იყო. საბედნიეროდ, მაშინ საფეხბურთო სამყარომ გასაოცარი პრინციპულობა გამოიჩინა და გამომძიებელი უკან გააბრუნა. კიდევ ერთ ფაქტს გაგახსენებთ - 2002 წელს, ფედერაციის პრეზიდენტის არჩევნების დროს, სააღმსრულებლო დეპარტამენტის წარმომადგენლები დარბაზში შემოსვლას აპირებდნენ, გარეთ კი შინაგან საქმეთა სამინისტროს საგანგებო დავალებათა ჯგუფის, ეგრეთ წოდებული ომონ-ის ხალხი იდგა და დარბაზში შემოჭრის ბრძანებას ელოდა. მაშინაც მიზანი იგივე იყო - მერაბი �დინამოდან� ჩამოიშორეს და ფიქრობდნენ, ბარემ, ფეხბურთის ფედერაციაც ჩვენი გახდესო. სამწუხაროდ, მაშინ პირველად მოახერხეს საფეხბურთო სამყაროს გახლეჩვა. თუმცა საბოლოო მიზანს მაინც ვერ მიაღწიეს... და აი, მთავარ სათქმელსაც მივადექი: უმაღლეს ლიგაში ჩვენი ადგილი სხვა კლუბმა რომ დაიკავა. მაშინ ფედერაციას ჟორდანია კი თავკაცობდა, მაგრამ ზეწოლის, ჩვენი დირექტორატის ერთ-ერთი წევრის დაჭერისა და უმკაცრესი გაფრთხილების შემდეგ, რომ დაჭერების სერიას გააგრძელებდნენ, მერაბი იძულებული გახდა, ანგარიში გაეწია მის წინააღმდეგ ამუშავებული სახელმწიფო მანქანისთვის და გაჩუმდა.
- ახლა რატომ გადაწყვიტეთ კლუბის დაბრუნება?
- სასამართლოს რეფორმებმა და დემოკრატიულმა პროცესებმა სამართლიანობის აღდგენის იმედი გაგვიჩინა. ამას გარდა, ევროპაშიც მოვიძიეთ პოტენციური ინვესტორები. და კიდევ: ჩვენთვის ძნელად შესაგუებელია, რომ ქართული ფეხბურთის ლიდერი თბილისის �დინამო� ეროვნული ჩემპიონატის ერთ-ერთი რიგითი გუნდი გახდა. �დინამო� არასდროს ყოფილა და არც უნდა გახდეს მეორეხარისხოვანი კლუბი. ჩვენი მიზანია, მინიმუმ 90-ანი წლების დონეს დავუბრუნდეთ, შემდგომში კი ბრენდის სტატუსი აღვუდგინოთ.
- ფედერაციას რა შეუძლია? იტყვიან, რომ თქვენს ნაცვლად ახალი �დინამო� უკანონოდ დაუშვეს და გუნდი თქვენ დაგიბრუნდებათ?
- ეს ფაქტი მთელმა ქვეყანამ იცის და ჩვენ არაფერს ვამატებთ. საბჭოთა კავშირის პირველობაზე მონაწილე თბილისის �დინამოს� მემკვიდრე ჩვენი გუნდი იყო და არა ის, რომელიც 2001 წლის გაზაფხულიდან ეროვნულ ჩემპიონატში უკანონოდ მონაწილეობდა. ჩვენი წილები რომ ვერ გადაიფორმეს და სამართალმემკვიდრეები ვერ გახდნენ, ამიტომაც ჩამოაყალიბეს �შპს დინამო თბილისი�. სხვათა შორის, შინაგან საქმეთა სამინისტრომ მაშინ კახა კალაძის მილანური ტრანსფერიდან წილიც მოითხოვა. მერაბისთვის ხელბორკილი არ დაუდიათ, მაგრამ შინაგან საქმეთა მაშინდელი მინისტრის სამი ყოფილი მოადგილის თანხლებით კიევში იძულებით წაიყვანეს. სურდათ, მისი დახმარებით მათთვის სასურველ ანგარიშზე დამჯდარიყო თანხა, რომელიც კლუბს ამ ტრანსფერიდან ეკუთვნოდა. მანამდე, კიეველთა პრეზიდენტი სურკისი ახალ �დინამოს� ლეგიტიმურად არ სცნობდა და ფულს არ უხდიდა. ჟორდანიასა და ძველ ხელმძღვანელობაზე სულ ასეთი ზეწოლა იყო. 2001 წლის მარტში შინაგან საქმეთა სამინისტრომ �დინამოს� ბაზიდან ძალით გამოგვყარა და თუ გახსოვთ, კახა თარგამაძემ �გამარჯვებულთა� მიტინგიც ჩაატარა. ახლა მითხარით, როგორ შეეძლო ჟორდანიას ასეთ ვითარებაში კლუბის შენარჩუნება? და მარტო კლუბი ხომ არ წაგვართვეს? - დიღმის საწვრთნელი ბაზა, სატრანსპორტო საშუალებები, უძრავ-მოძრავი ქონება, პლუს საფეხბურთო სკოლა �ნორჩი დინამოელი�, ეროვნული, ახალგაზრდული და სხვადასხვა ასაკობრივი ნაკრებების 60-მდე ფეხბურთელი და უფლებები 600-მდე პერსპექტიულ ფეხბურთელზე. ფაქტობრივად, განკულაკება მოგვიწყვეს. ზარალმა, დაახლოებით, 25 მილიონი დოლარი შეადგინა, აღარაფერს ვამბობ მორალურ ზარალზე, რომელიც ბევრად მტკივნეული აღმოჩნდა - უსაზიზღრესი ხმებისა და ჭორების გავრცელებაზე აღარაფერს ვამბობ. ეს იმიტომ გააკეთეს, რომ თბილისის �დინამო� ქერის ორმო ეგონათ, მაგრამ კლუბში რომ მივიდნენ, მიხვდნენ - საქმე სულ სხვაგვარად იყო, უდიდესი თანხები იყო დასახარჯი და იქით მისატანი. ამის სურვილიც არ გააჩნდათ და ამიტომაც მიჰყიდეს კლუბი ბადრი პატარკაციშვილს.
- იყო შანსი, რომ მოვლენები ასე არ განვითარებულიყო?
- წარმოუდგენელია, რადგან კახა თარგამაძე იყო განკულაკების ორგანიზატორი და რაც უნდოდა, იმას აკეთებდა. თუ გახსოვთ, 1996 წელს, დავით ყიფიანის დროს, უეფას თასზე ოთხი ეტაპი გავიარეთ და დიღმის ბაზაზე ედუარდ შევარდნაძე და შინაგან საქმეთა მინისტრი გვეწვივნენ. მაშინ ძალიან ცუდად მომხვდა გულზე შევარდნაძის სიტყვები - მან თარგამაძე �დინამოს� პრეზიდენტად მოიხსენია. არადა, თარგამაძე მხოლოდ სპორტსაზოგადოება �დინამოს� პრეზიდენტი იყო.
- მოკლედ, უმაღლეს ლიგაში �დინამოსთვის� ადგილის დაბრუნებას ითხოვთ. ქონებასთან დაკავშირებითაც გექნებათ პრეტენზიები...
- ჩვენ ისეთი დოკუმენტაცია აღმოვაჩინეთ, პროცესი ბოლომდე უპრობლემოდ უნდა მივიყვანოთ. თუმცა ჯერ უმაღლეს ლიგაში ადგილის დაბრუნებაზეა ლაპარაკი. �დინამოს� დღევანდელ ხელმძღვანელობას ამ საქმეში მხარედ არ მივიჩნევთ, რადგან უკანონობა შინაგან საქმეთა სამინისტროს ძველმა ხელმძღვანელობამ ჩაიდინა.
- უმაღლესში ადგილი რომ დაგიბრუნონ, მაგრამ ქონებაზე უარი გითხრან, სად ივარჯიშებს გუნდი?
- სახელი და ქონება ერთმანეთზეა მიბმული და გამორიცხულია, არ დაგვიბრუნონ. ჩვენი �დინამო� მხოლოდ დიღმის ბაზაზე ივარჯიშებს.
- მართალია, თითქოს �დინამოს� დაბრუნების იმედი უკვე მეორე ეტაპიდან გაქვთ?
- დიახ, მეორე ეტაპიდან გუნდის დაბრუნების იმედი ნამდვილად გვაქვს...
